المراحل العشر لكي تكتشف أنك حلوف الغابة :
1- كتلاقا شي حلوف اكبر منك منخرط فشي شركة من هدوك و كيبدا يكذب عليك و يقولك راه شركة مزياااانة و راه كيربح معاها xxxxx درهم في الدقيقة. و ما كايبغيش يوريك شحال ثمن الإنخراط كايبقا يوريك غا شحال كيربحو ناس لي في الشركة و كايوريك داك التونسي لي ربح فيراري عطاوها ليه و باش تولي بحالو خاصك غير تنخرط معاه تحت الاسم ديالو ..و أنت غا حال فمك بحال المزڭيطي
2- كتيق بيه و تمشي تعطي الفلوس اللي كتكساب و انت كُلّك أمل أنك غادي تولي منايري و دوماني ..
3- كيدوز شهر و شهراين و الحصيلة أنك اعطيتي فلوس بزاف و دابا يالاه رجعتي منها 100 درهم أو 200 و عندك شي شمبوان و شي كريم ديال الرجلين ماعرفتيهم حتى باش مصنوعين و شي تيليفونات ما عرفش تا السمية و النظام لي خدامين بيه لا جودة لا 6 حمص ..
4- كتمشي عند صاحب دعوتك كتشكي ليه كيقول ليك راه الحل الوحيد هو تجيب ناس أخرين يتسجلو معاك باش تضمن ترد فلوسك هاااااا تامليونيرت و الحلم تولي منايري تبخر ..
5- كتكتاشف أنه صعيب تقنع الناس حيث ماشي كلهم حلالف بحالك ولي ختراعو الجملة الشهيرة ( واش حنا جينا نخموا باش نتخلصوا و لا جينا نخلصو ) و كتبدى تكذب كذبات كبار و كتقول للناس أنك هاد الشهر ربحتي 5 مليون بسهولة و انت في الحقيقة خرجتي من الدار بلا فطور.
6- كتفهم أخيرا أن فلوسك و فلوس اللي دخلو معاك في نفس الوقت هي نفس الفلوس اللي تخلصوا بيها الناس اللي قبل منك، و من بينهم هادا النيت اللي كذب عليك و دخلك معاه.
7- مع الوقت كيزيد يقلالو الحلالف و كيزيد يصعاب تلقى منخرطين جدد باش ترد حتى انت فلوسك.
8- (عاجلا ماشي آجلا) كيتفرش الفيلم و الناس كيبداو يغوتو و هاداك مول الفكرة كيعلّق و كيطير بفلوس كل الحلالف اللي طاحو في الفخ ، وما عندك ما تدير ليه ، حيث هو أصلا تيتلاقى الناس غير في قاعات ديال الفنادق او تيكون كاري شير برطمة و حاط فيها جوج بيرويات و بنيتة زعرة كتعرف تقول بونجور.
9- في الأخير كتفقد الأمل في استرجاع "تحويشة العمر" اللي مشات ليك و كتعترف أنك كنتي حلّوف.
BONUS
10- من بعد مدة كتلاقى شي واحد خدام فشي شركة أخرى و كيقول ليك أن هاد الشركة ماشي بحال لخرين و أنها ماشي بونزي ماشي هرمية و الربح ديالها مضمون.
- و عاود قرا من المرحلة رقم 2
تعليقات
إرسال تعليق